28
06.2017

【冒險體驗】Planet J 冒險王國@澳門金沙城中心

環球旅遊(主題樂園)  

香港嘅主題樂園,大家都應該好熟悉喇!魔石王國嘅故事,你又有冇聽過呢?今次我哋一於衝出香港,體驗一下全球首創實況角色扮演嘅主題樂園。跟貼啲,跟住我哋嚟啦!
又一次搭船過澳門,晴朗已經期待咗好耐喇!


一個鐘頭多啲嘅船程,話咁快到步!全新氹仔碼頭環境好大呀!


入境櫃檯比以前多咗,過關又慳番唔少時間喇!出到去見好多的士等候,但主題樂園位於酒店,當然係搭又快又免費嘅shuttle啦!XD


shuttle職員送嘅揭揭咭抽中餐飲優惠,正喎!


車程唔駛10分鐘,有冇咁快呀?@.@ 講咗咁耐都未介紹我哋嘅目的地添!就係位於金沙城中心嘅Planet J冒險王國喇!位置響3樓food court隔離,好易搵!


到喇!到喇!即將要展開緊張刺激嘅冒險旅程,are you READY???


嘩!原來場地咁大,分咗8大主題區。朗朗手上果部係「魔導卷」,擁有GPS功能,我哋要用佢嚟接收唔同任務㗎!


響歷險旅程之前,不如先裝裝身,咁就可以玩得更加投入啦!


Wow~ 仙子出沒注意!晴晴已經化身成為小天使....定係小仙子呀?唔緊要啦!小朋友開心咪得囉!XD


朗朗亦都變身成為勇士喇!冇錯!你哋就係被選中嘅冒險使者!快啲拎埋魔導卷一齊踏上旅程啦!


出發前,先睇睇魔導卷介紹魔石王國嘅故事,然後就要馬上去協助王國渡過危機喇!

旅程中可能會遇到各種難題,仲會同王國唔同角色相遇~

盡全力發揮你哋嘅智慧啦!


冒險使者們即將要接受各種考驗,加油呀!


第一個任務係要去藍色通道嘅地方,位於皇宮裡面~


左邊紫色,右邊藍色,係藍色呢邊喇!跟住嚟啦!


入去「銀劍回廊」搵下魔導卷指定嘅遊戲裝置囉!


呢個遊戲叫做「謎途棋盤」,按指示轉番啱國王、皇后佢哋嘅位置就可以完成遊戲。得咗!接住要去第二個任務喇!


今次要搵紫色通道。「金杖殿堂」果邊係紫色㗎!話咁快又搞掂一個任務lu~


朗朗嘗試跟魔導卷嘅指示,自己搵出下一個地方~


耐心聆聽任務內容,再用心完成,呢個就係成功嘅關鍵喇!


即將要展開一場激烈嘅打鬥,使者們準備好未?


用劍斬,加埋盾牌防護。左閃、右避,終於成功擊敗邪惡嘅魔石獸,有驚無險呀!^^V


氣都未回,馬上又要進行下一個任務喇!


呢度地方咁大,要留意指示牌同記住自己行過嘅路,唔係好易會迷路㗎!


終於搵到魔導卷所載嘅肥料喇!又完成一個~ Yeah!!!


下一個任務要到光明森林接受「共鳴甲蟲果」嘅考驗,反應速度慢啲都唔得呀!使者們又再一次過關~


每完成一個任務都會好開心、好有滿足感~


我哋要加強裝備先可以繼續應付挑戰,快啲穿上魔法靴作保護啦!


踏踏火山突然再度活躍,使者們以靈敏嘅身手,最終能夠在火山爆發之前令冰火蜂們冷卻火山。又過一關~ ^^V


嚟到紅礦村嘅魔石店,裡面啲石頭閃閃發光好靚呀!


最後一個任務要去藍山鎮,呢個係Planet J啱啱新建成嘅區域,係一個繁華嘅商業區嚟呀!


搵到麵包店喇!快啲把握時間焗出香噴噴嘅麵包啦!


任務完成!使者們都可以抖抖喇!食住爆谷慢慢嘆,好爽呀!


即場like & share wechat或facebook送爆谷+貼紙+現金券~

每次冒險旅程時間為60分鐘,如果唔夠喉,可以續租魔導卷~

費用為$60/30分鐘,$110/1小時

想下次先再嚟玩過又得!魔導卷儲存咗上次記錄,下次嚟又可以load番嚟玩喇!


唔同時間會有唔同嘅寶石王國角色出嚟同大家影相,呢隻係呆呆鼠,佢個樣真係有啲呆喎!XD

完成任務後,可以四圍行下,影下相~

如果想出去食啲嘢,再番入嚟玩過又得!

入場費用係包玩全日加嘛!


晴晴已經急不及待到處跑喇!精力依然十分旺盛,果然係勇者,好強呀!XD


即管盡情影相同玩啦!繼續放電去囉!gogogo~


期間仲遇到魔法師添!好幸運呀!^^


交還魔導卷嘅時候,可以用遊戲積分換取現金券。唔記得講,場內設有免費wifi,上網速度都好流暢㗎!


晴朗收到現金券就嚷著要去精品店,結果買到的當然比現金券嘅價值多啦!^^'''

唔緊要!最緊要開心!

多謝晒晴朗爸爸!不過佢好似流到一頸血喎!XD


冒險過後,係時候要補充能量喇!過隔離food court醫醫肚先~

地方咁大都可以九成滿座,一定有佢嘅吸引之處~

世界各國嘅菜色都有齊喎!啱晒唔同人口味啦!


晴朗又有新寵兒,好開心呀!


仲記得晴晴響Planet J同「雙子精靈」你追我逐,玩到癲晒!勁鍾意呢個角色,仲要帶埋佢番屋企添呀!


魔石寶寶同朗朗並肩作戰咗咁耐,當然要帶埋佢走啦!


玩下玩下,嘢食都到齊喇!

日式蛋包飯、台式三寶牛肉麵、新加坡肉骨茶,估唔到food court啲嘢都咁有質素喎!

全部都好啱口味,好好味呀!


似乎真係好肚餓,但都唔駛食得咁「喉禽」下嘛?XD


食飽飽經過Planet J,又見到寶石王國嘅精靈喇!梗係要即刻埋去捉住佢影相啦!cheers~

Planet J建議6-14歲小朋友最適合玩,但我同晴朗爸爸都玩埋一份,在場都見好多青年人。計我話,大人細路都咁啱玩呀!

快樂嘅時間過得特別快,又係時候講拜拜!


回程時候,再次踏足氹仔新碼頭,真係好大!不過可惜冇餐廳又冇手信賣。不過總算可以幫我慳番啲~ XD


晴朗候船期間,仍然係玩梗兩隻公仔,應該仲好回味在Planet J嘅時光呢!


人去留空,每次旅程完結嘅時候都總會依依不捨。不過好快我哋又會再嚟過喇!We'll be back~^o^

平時去慣去熟香港嘅主題樂園,嚟到澳門Planet J冒險王國遇到嘅全部角色都係新面孔,好有新鮮感!未去過都唔知地方咁大,佔地十萬平方呎,分8大主題區。我哋跟魔導卷玩過皇宮、綠田村、紅礦村、光明森林、魔石礦洞同藍山鎮嘅遊戲裝置,仲有召喚間同皇家紀念公園就要留待下次再去發掘喇!樓底高,地方大,每個區域都裝修得好靚,就好似置身響一個真實嘅小鎮咁。由美國迪士尼樂園及環球影城嘅世界級設計班底打造嘅冒險歷程,果然係唔同啲呀!晴朗東走走、西走走,估唔到佢哋能夠完成晒所有任務呀!過程中不但可以提升小朋友嘅解謎、邏輯、體能、運算同埋智力,仲加強咗佢哋嘅合作精神添!好笑又好玩!我哋大人在旁觀看都樂在其中。接受完不同挑戰後,見到佢哋好有滿足感。在冷氣充足嘅環境之下,全程冇出過一滴汗。簡直係炎熱天氣下一個唔錯嘅親子好地方呀!

Planet J會員可享有生日和兒童節優惠,仲有其他優惠㗎!大家有興趣嘅都快啲上網登記啦!
會員登記:http://member.planetj.com/Membership/signin.jde

精華片段:

主題區相片:

(想下載相片,可直接按此開啟相簿)


Planet J冒險王國
營業時間︰
星期一至五:10:00 ~ 19:00 (最後入場時間︰18:00)
星期六、日及公眾假期︰09:30 ~ 20:00 (最後入場時間︰19:00)
(全年無休)
入場門票︰$150/位
魔導卷租用︰$150/小時
電話:(853)8791-6000
地址:澳門路氹金沙城中心金沙廣場3樓3009號鋪
網址:http://www.planetj.com/tc/home


FIND US on:
     

BLOGs:

CONTACT US:

發表於2017.6.28
留言(0)
博客名稱 :
晴朗媽媽
網誌名稱:
晴朗天 - 食·玩·育·美·愛の親子平台
使用天數:518
年齡:1
電郵:chinglongtin@gmail.com
按月份瀏覽
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
    2016
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 生活品味
  • 電影戲劇
  • 攝影寫真
  • 其他
  • 財經生活