博客名稱 :
雀后
網誌名稱:
雀后 ~歡迎!歡迎蒞臨朱家天地!
自從天耀村冇咗個街市後,
我哋就要行去附近屋苑嘅街市買餸,
係大熱天時日日係咁行,
又拎住咁多餸返屋企,
真係由頭濕到落腳架!
好彩近日屋苑商場開咗個小型街市,
有雞、魚、菜、牛肉、豬肉和生果賣,
雖然全部都係得1檔,
但都好過冇,
依家新開貨品價錢都幾公道,
暫時都唔算好貴呀!
今日就係新街市買咗隻龍崗雞,
材料: 雞1隻、薑1大片拍碎
醃料; 鹽2茶匙、糖1茶匙、紹酒半湯匙
調味: 孜然粉、紅辣椒粉、花椒粉
做法: 洗淨雞後,用廚紙索乾水份,從雞背剪開一半(中間背骨剪掉),
用手將雞胸位壓平,加入醃料和薑醃8小時;
從雪櫃取出雞放室溫1小時後,落調味醃雞兩面,
放入易潔鑊內用中火慢慢煎至兩面熟,
又或放入焗爐用200度焗30分鐘便成。
~第一次用雙面鍋煎全雞,每面煎咗15分鐘合其30分鐘,效果都唔錯喎!
不過火喉仲未摸熟,煎燶咗少少呀!
大家可以入嚟Facebook讚下我新開嘅Fans專頁呀!